Sesé naceu o 26 de decembro de 1965 nunha familia traballadora de valores republicanos, na parroquia de Chapela, no concello de Redondela. Desde moi nova sentiu a necesidade de tomar partido e comprometerse na loita pola xustiza social. No ano 1983 interrompe os estudos de bacharelato, casa e viaxa a Venezuela.

Neste país colabora no grupo sociocultural Rabo de nube, vinculado ao movemento muralista sudamericano e inspirado polo pintor surrealista chileno Roberto Matta. O colectivo no que participa Sesé mantén relación con estudantes do Frente Patriótico Manuel Rodríguez e coa Brigada Ramona Parra, moi activa na denuncia da represión en Chile.

Durante a súa etapa en Venezuela nacen os seus dous primeiros fillos, Lucía e Joshua, e abre varios negocios ligados á contracultura, entre eles unha tenda de música. A través da correspondencia coa súa amiga Cármen Arias, Sesé relata a desesperación da poboación fronte á corrupción das oligarquías, a inflación descontrolada e a fonda fenda entre clases sociais.

En 1993 regresa a Chapela cos seus fillos, xa separada, para establecerse definitivamente. Forma parte da Coordinadora Feminista de Donicela, participando en proxectos como os Encontros Internacionais de Córdoba e Vigo, e colabora activamente na recentemente creada Marcha Mundial das Mulleres.

Desde unha posición claramente feminista, loita polo dereito ao divorcio, polo dereito ao aborto, pola ocupación dos espazos públicos e polo dereito das mulleres a vivir sen violencia, retos centrais daqueles primeiros anos. En Vigo entra en contacto co movemento polo dereito á vivenda e pasa a formar parte do Centro Social Ocupado e Autoxestionado da rúa de Núñez, onde realiza un vídeo documental sobre a actividade do colectivo.

A finais dos anos noventa participa en diversas intervencións arqueolóxicas, como o xacemento romano da rúa Marqués de Valadares (Vigo) ou a Necrópole Megalítica da Mámoa do Rei (Redondela), converténdose nunha colaboradora moi activa. A partir desta experiencia, colabora con entidades de recuperación da memoria histórica e participa na exhumación da fosa común onde se atopaba o seu avó materno, Perfecto Méndez Pastoriza, republicano fusilado xunto con outras persoas inocentes en Xinzo (Ponteareas).

En novembro de 2002, tras a nefasta xestión do afundimento do Prestige, máis de 77.000 toneladas de fuel contaminan a costa galega. Xorde entón o movemento Nunca Máis, do que Sesé forma parte activamente desde a rúa, o voluntariado e o activismo artístico, participando na creación dunha gran escultura en forma de gaivota contaminada que viaxa ao gran acto galego celebrado en Madrid.